PERIFÉRICOS

Si no caso de "A pie de calle" falabamos dalgunhas tendencias dese ente escorregadizo que podemos chamar de xeito impreciso, porque dalgunha forma o temos que enunciar, como audiovisual artístico; as obras programadas baixo o título de "Reflejos" participan das formas hexemónicas deste tipo de audiovisual.

Así por exemplo Everything Changes (Egon Bunne, 1990) preocúpase polo tratamento da imaxe establecendo analoxías entre diferentes períodos da historia alemana. O resultado formal deste traballo, feito no contexto inmediatamente posterior da Berlín post-1989 (está datada en 1990) é moi do gusto das obras en vídeo dos oitenta (coas súas viraxes e a súa intervención tecno-manierista na imaxe).

Fucking Electricity/Currents of Death (Vadim Yuryevich Koshkin, 1993) é un exemplo característico dese tipo de prácticas fílmicas vangardistas nas que se utilizan imaxes de arquivo (neste caso acompañadas de distorsións sonoras). Esta técnica, coñecida como found footage ou cinema reciclado, é hoxe a máis recorrente do audiovisual artístico. Algo lóxico nun contexto neohelenístico dixital de "contaminación" visual por exceso na que xa se teorizou sobre o fin de todo.